Despois de recibir o encargo da Axencia Galega de Infraestruturas en 2018, a Fundación RIA desenvolveu un estudo para a integración da autovía AC-305 no centro de Palmeira. Esta infraestrutura viaria percorre o litoral pola marxe norte da ría e, construída dende a lóxica da fluidez do tráfico, provocou o distanciamento das actividades sociais e a degradación do tecido comercial local.

A partir da análise e do traballo de campo realizado, RIA estableceu unha serie de estratexias de actuación dirixidas a reducir a velocidade máxima permitida, priorizando a mobilidade peonil e reforzando as conexións cruzadas. As directrices tamén contemplaban a mellora da accesibilidade e a dotación dunha banda verde na que, acompañando a toda a actuación, alberga elementos de vexetación e mobiliario público.

A elaboración destas primeiras directrices deu paso á licitación do proxecto de execución por parte da Consellería de Infraestruturas e Mobilidade, que foi adxudicado en 2021 a Naos e TECYP e aprobado a semana pasada . Esta decisión dá luz verde á licitación das obras, que está previsto que comecen este outono.

O estudo realizado por RIA en 2018 tomando o núcleo de Palmeira como proxecto piloto de rexeneración urbana tamén sentou as bases de estratexias de intervención replicables noutros lugares e mesmo noutros puntos da AC-305.

Por este motivo desde 2020, continuando esta liña de traballo, a Fundación RIA participa nun convenio de colaboración coa Consellería de Infraestruturas e Mobilidade para a realización doutros cinco estudos pola AC-305 nas localidades de Taragoña, Boiro, Escarabote, A Pobra do Caramiñal e Coroso, naquelas zonas onde existe unha maior conflitividade entre o tráfico rodado e o tráfico peonil.