O Foro Territorio Rural Resiliente é unha iniciativa impulsada pola Fundación Juana de Vega e LaboraTe (USC) en colaboración coa Fundación RIA, a Fundación Roberto Rivas e o Colexio de Xornalistas de Galicia para abordar de maneira conxunta os retos do rural galego. Articulado a través de seis mesas de traballo temáticas, este proceso está a reunir a máis de 120 representantes de administracións públicas, entidades sociais, agrupacións sectoriais e comunidade científica.

RIA coordina unha destas seis liñas de traballo, centrada na gobernanza e na cooperación público-privada-comunidade para a ordenación territorial. Esta mesa ten como obxectivo reflexionar sobre a capacidade organizativa e de acción conxunta de distintos axentes públicos e privados no rural, abordando a situación actual, os mecanismos de colaboración existentes, as súas principais eivas e, especialmente, os camiños para melloralos co fin de avanzar cara a un territorio máis activo e resiliente.

Este proceso de reflexión colectiva culminará nun evento aberto ao público xeral mediante inscrición o 28 de maio en Santiago de Compostela. Na web foroterritoriorural.gal habilitouse un formulario para que calquera persoa poida enviar achegas, ideas ou propostas que amplíen e complementen o proceso.

Esta nova fase, aberta á participación da cidadanía, reforza o carácter colaborativo do Foro Territorio Rural Resiliente, unha iniciativa impulsada desde a sociedade civil galega que busca contribuír a un territorio rural máis activo, resiliente fronte aos incendios e preparado para afrontar os retos económicos, demográficos, climáticos e ambientais, a través dunha mellor ordenación e xestión territorial.