A Fundación RIA inicia unha colaboración de tres anos coa Yale University, unha das institucións académicas de referencia internacional, para impulsar un ciclo de programas educativos centrados nos retos e oportunidades do territorio galego. A primeira edición desenvolverase durante este mes de xuño e terá como ámbito de traballo o Parque Natural das Fragas do Eume. Durante tres semanas, estudantes de segundo curso de arquitectura participarán nunha estadía académica coordinada pola profesora Ana María Durán e a Fundación RIA, con base en Casa RIA.

O programa intégrase no proceso que a fundación está impulsando nas Fragas do Eume, un espazo natural protexido de máis de 9.000 hectáreas que afronta importantes desafíos de gobernanza e sustentabilidade ambiental, económica e social. A través de sesións de traballo, investigación e visitas de campo, o alumnado analizará cuestións como a protección da biodiversidade, a mobilidade, a gandaría extensiva, a xestión forestal, o turismo, a posta en valor do patrimonio ou o encaixe das enerxías renovables, tomando contacto directo co territorio e cos distintos axentes implicados.

A colaboración permitirá tamén compartir co alumnado os métodos e procesos desenvolvidos pola Fundación RIA no ámbito da planificación estratéxica, a gobernanza e o desenvolvemento territorial. Ademais do acompañamento do equipo da fundación, o programa contará coa participación do arquitecto Manuel Bouzas e doutras persoas expertas nos campos da arquitectura, a paisaxe, a ecoloxía e a planificación territorial, que achegarán perspectivas complementarias sobre os retos da transición ecolóxica e a xestión do territorio.

Esta iniciativa reforza o papel de Casa RIA como espazo de encontro entre universidade, territorio e sociedade, favorecendo o intercambio de coñecemento e a aprendizaxe a través da experiencia directa. Ao mesmo tempo, consolida a aposta da Fundación RIA por conectar institucións académicas internacionais cos desafíos reais do territorio galego, empregando os exercicios académicos como unha ferramenta para explorar novas ideas, ampliar capacidades e contribuír á construción de futuros máis sostibles.