O martes 18 de febreiro, Casa RIA acolleu á arquitecta e autora británica Carolyn Steel, quen inaugurou o ciclo Encontros de mercado. Este evento promovido pola Fundación RIA ten como obxectivo poñer en valor as prazas de abastos galegas, destacando a súa importancia no contexto da cultura gastronómica local e internacional.

Carolyn Steel, coñecida pola súa obra Sitopia e a súa defensa da soberanía alimentaria, iniciou o ciclo cunha visita ao mercado de Santiago, onde –acompañada polo cociñeiro Iago Pazos– percorreu os postos para descubrir os produtos locais e de tempada que máis tarde formaron parte dun menú especial servido en A Cantina.

A xornada continuou cunha conferencia impartida por Steel na Fundación RIA, onde compartiu as súas reflexións sobre a relación entre a cidade e a comida, ao tempo que salientou a importancia de repensar os sistemas alimentarios para xerar espazos urbanos máis saudables e sostibles.

O broche gastronómico da xornada chegou coa cea co-deseñada entre Carolyn Steel e Iago Pazos, un menú que reflectiu a filosofía de proximidade e tempada. O menú incluíu pratos como unha menestra de inverno, unha pescada fritida de Ribeira e un roastbeef de tenreira galega, acompañados por queixos locais, marmelo e noz. Para rematar, o menú tamén incluíu doces de elaboración propia e unha selección de viños galegos, que reforzaron a conexión co produto local e a tradición gastronómica galega.