A conversa, titulada «Celebrar os obxectos cotiáns», situará o foco nos obxectos vinculados á comida e á cociña, abordando o deseño como un elemento clave na creación de experiencias compartidas.

O encontro convidará a reflexionar sobre os espazos nos que se desenvolven estas prácticas e sobre os obxectos que acompañan o acto de comer, atendendo á súa dimensión funcional, simbólica e cultural. A sesión estará conducida por Maite Sebastiá, directora editorial de AD España, quen dialogará con David Chipperfield nunha conversa aberta arredor dos obxectos que nos rodean e da súa relación co territorio, a proximidade e a cultura gastronómica.

«Deseño en conversa» é un ciclo de catro encontros no marco do programa público da exposición actual en Casa RIA, concibido como un espazo de diálogo arredor do papel do deseño na vida cotiá.

Tras Maite Sebastiá, será a quenda de Tim Marlow, Edward Barber e Alice Rawsthorn, que conversarán con David Chipperfield nas tres seguintes conversas, sobre distintas dimensións do deseño: os obxectos que nos acompañan arredor da mesa, a cultura do deseño, o oficio e o deseño como actitude.