«Deseño para vivir» presenta unha selección de obxectos desenvolvidos polo estudio David Chipperfield Design nos últimos 35 anos. Tomando como base a reflexión sobre o proceso de deseño, a exposición cuestiona, nun momento de cambios sociais e crise ambiental, cal debe ser o papel do deseño de cara a empregar os recursos de xeito máis responsable, reforzando identidades e valores locais e adoptando unha aproximación arraigada no territorio e na vida cotiá.

A partir do deseño dunha casa en Corrubedo a inicios dos 2000, David Chipperfield Design estableceu unha relación cada vez máis próxima con Galicia, que foi unha crecente fonte de inspiración nos últimos anos. Neste sentido, a mostra pon en valor a longa tradición galega arredor do “facer”, volvendo a mirada sobre modos de produción tradicionais que empregaban como base os recursos dispoñibles no territorio e destacando a contribución de empresas galegas innovadoras que traballan a escala global.

A mostra esténdese máis alá da tradicional sala de exposicións mediante un percorrido polos espazos das dúas primeiras plantas de Casa RIA nos cales o mobiliario xa presente no edificio se complementa cunha variada selección que inclúe obxectos, bosquexos, revistas, fotografías de proceso, materiais, maquetas, prototipos e referencias; mostrando o proceso de deseño de xeito integral e formulando varias cuestións:

Cal debería ser o papel do deseño no contexto actual? Como inflúe a crecente preocupación por manter as tradicións propias, empregar materiais locais e considerar as consecuencias das técnicas industriais na maneira en que deseñamos, fabricamos e distribuímos os produtos? Que é o deseño en Galicia?