As prazas de abastos son espazos de encontro, de transmisión de coñecemento e de respecto pola tradición alimentaria. Pero tamén son escenarios de aprendizaxe onde o emprendemento e a formación profesional poden atopar unha conexión co mundo real.

Nesta conversa aberta contamos con Almudena Ávalos, xefa de gastronomía de El País, e Ricardo Fernández, profesor de cociña e pastelaría do centro de formación profesional Carlos Oroza de Pontevedra, quen conversan sobre o papel fundamental dos mercados como espazos de ensino e capacitación, a importancia de coñecer e valorar o labor dos produtores e o desafío de vincular a formación culinaria co tecido profesional.

Unha oportunidade para reflexionar sobre o futuro da gastronomía desde a súa raíz: os produtos, os oficios e o saber facer que sosteñen a calidade alimentaria.

Consulta toda a información sobre o evento.

Carolyn Steel, coñecida pola súa obra Sitopia e pola súa defensa da soberanía alimentaria, iniciou o ciclo Encontros de mercado cunha visita ao mercado de Santiago, onde –acompañada polo cociñeiro Iago Pazos– percorreu os postos para descubrir os produtos locais e de tempada que máis tarde formaron parte dun menú especial servido ese día en A Cantina.

A xornada continuou cunha conferencia impartida por Steel na Fundación RIA, onde compartiu as súas reflexións sobre a relación entre a cidade e a comida, ao tempo que salientou a importancia de repensar os sistemas alimentarios para xerar espazos urbanos máis saudables e sostibles.

Consulta toda a información sobre o evento.

Os mercados de abastos son pezas clave no sistema alimentario galego, fundamentais para unha alimentación local e sostible. As estratexias alimentarias, xunto con iniciativas que fomenten o consumo de proximidade, desempeñan un papel decisivo nesta transformación.

Enmarcada na programación pública de Casa RIA sobre o papel dos mercados no territorio, convidamos a catro persoas para falar de iniciativas galegas que, a través do consumo en rede, promoven unha alimentación sostible:

→ Emilio V. Carral, doutor en Ciencias Biolóxicas, compartirá a súa experiencia na iniciativa participativa Eo Alimenta, que impulsa estratexias alimentarias na biorrexión do río Eo.

→ Claudia de Sas, paisaxista especializada en planificación territorial e desenvolvemento rural na Fundación RIA, coordina as accións de transformación de alimentos do Laboratorio Ecosocial do Barbanza.

→ Manuel Jesús Rey presentaramos o traballo de Nonéomesmo, unha iniciativa compostelá que tece redes entre labregas, comercios, restaurantes e consumidoras para fomentar o consumo local.

→ Lucas Requejo acompañaranos para falar de A Mariña Lab, un laboratorio dedicado a garantir a produción de alimentos no futuro da comarca mediante a aplicación da innovación e o desenvolvemento sostible.

Consulta toda a información sobre o evento.

Sabemos o que bebemos? Por que escollemos un viño e non outro? Que presenza ten o viño nas prazas de abastos galegas?

Cristina Alcalá e Mariña Fernández falan do viño desde a calidade, a sustentabilidade, a ética e o territorio. No marco da programación arredor das prazas de abastos, visitan Casa RIA para compartir unha conversa aberta sobre o viño como identidade cultural.

Ao rematar, a conversa continúa para compartir un viño en A Cantina.

Consulta toda a información sobre o evento.

Senmais iniciou os encontros «arredor da mesa», un formato de A Cantina de Casa RIA para coñecer diversas voces, iniciativas e persoas que a través do comer e do beber poñen en valor o territorio.

Nesta ocasión, Ana Corredoira visítanos para dar a coñecer o traballo e os produtos de Senmais, o proxecto cooperativo de dúas familias de Palas de Rei que hai 20 anos apostaron por un modelo de negocio que tivese un impacto positivo no territorio.

Consulta toda a información sobre o evento.

María Sánchez, veterinaria e autora de Fuego la sed, visitou Casa RIA para conversar sobre a súa visión das prazas de abastos e a súa relación co sector primario.

Consulta toda a información sobre o evento.

Unha selección de literatura, obxectos e produtos relacionados co “comer” que durante cinco días demostran a importante dimensión da alimentación na nosa identidade.

En colaboración coas librarías compostelás Numax, Couceiro e CGAC, o mercado ofrece unha ampla variedade de publicacións que permiten mergullarse na alimentación, a cociña e o territorio.

Ademais, a tenda efémera de Nadal incorpora o deseño de David Chipperfield Design, en colaboración coas marcas Alessi e Wästberg, a través de varios obxectos cotiáns que se poden atopar nos diferentes espazos de Casa RIA.

Tamén, varias prendas e utensilios para facer a compra, especialmente deseñados para a ocasión, incorporan o deseño téxtil da firma D-Due, que viste ao equipo de A Cantina, confeccionados a man con fibras naturais desde Rianxo.

Por último, A Cantina ofrece durante estes días unha selección de doces elaborados no seu obradoiro, así como bebidas e outras preparacións “feitas na casa” que representan os valores de proximidade, tempada e conciencia alimentaria.