Nun mercado alimentario cada vez máis estandarizado, as pequenas producións precisan ferramentas que permitan recoñecer o seu traballo, diferenciar os seus produtos e poñer en valor os coñecementos e procesos que as fan singulares. Artesanía Alimentaria de Galicia propón un marco para identificar e dar visibilidade a estas formas de producir, así como para ofrecer garantías sobre os procesos e características dos produtos que elaboran.

Para abordar esta e outras iniciativas, contaremos con Martín Alemparte, director da Axencia Galega da Calidade Alimentaria, nun encontro con diferentes produtoras que achegarán as súas experiencias particulares relacionadas coa transformación alimentaria e a produción a pequena escala.

A conversa permitirá tamén reflexionar sobre os retos que se presentan ante este tipo de producións á hora de competir no mercado con alternativas de carácter industrial e sobre o papel que pode desempeñar o recoñecemento da artesanía alimentaria para xerar valor sen perder aquilo que as fai singulares.

A sesión completarase cunha pequena degustación dos produtos das participantes, ofrecida por Agacal e deseñada por Iago Pazos, como unha forma de achegar ao público a diversidade de produtos e formas de elaboración que conviven dentro da Artesanía Alimentaria de Galicia.